മെയ് 16-ന് 12 സ്മാർട്ട് റോഡുകൾ ഉൾപ്പെടെ സംസ്ഥാനത്ത് പൂർത്തിയാക്കിയ 62 റോഡുകളുടെ ഉദ്ഘാടനവുമായി ബന്ധപ്പെട്ട് പ്രചരിപ്പിക്കുന്ന വാർത്തകൾ അടിസ്ഥാനരഹിതമാണെന്ന് മുഖ്യമന്ത്രിയുടെ ഓഫീസ് അറിയിച്ചു. അന്നേ ദിവസം മുഖ്യമന്ത്രി പിണറായി വിജയൻ ആരോഗ്യപരമായ കാരണങ്ങളാലാണ് ഉച്ചയ്ക്ക് ശേഷമുള്ള മൂന്ന് പരിപാടികൾ റദ്ദാക്കിയത്. കാലവർഷ മുൻകരുതലുമായി ബന്ധപ്പെട്ട് വിളിച്ച പുനരവലോകന യോഗം, റോഡ് ഉദ്ഘാടനം, സ്റ്റുഡന്റ് പോലീസ് കേഡറ്റുകളുടെ പരിപാടി എന്നിവയായിരുന്നു റദ്ദാക്കിയ പരിപാടികൾ.

എന്നാൽ, പിന്നീട് സമൂഹമാധ്യമങ്ങളിൽ റോഡ് ഉദ്ഘാടന പരിപാടിയിൽ മുഖ്യമന്ത്രി പങ്കെടുക്കാത്തതിന് മറ്റെന്തോ കാരണങ്ങളുണ്ടെന്ന രീതിയിൽ വാർത്തകൾ പ്രചരിപ്പിക്കുകയായിരുന്നു. സംസ്ഥാന സർക്കാരിന്റെ നാലാം വാർഷിക പരിപാടി വിജയകരമായി മുന്നേറുന്ന ഈ സാഹചര്യത്തിൽ, അതിന്റെ ശോഭ കെടുത്താനും ജനങ്ങളിൽ തെറ്റിദ്ധാരണ പരത്താനുമുള്ള രാഷ്ട്രീയ ലക്ഷ്യത്തിന്റെ ഭാഗമാണ് ഇത്തരം വ്യാജ പ്രചാരണങ്ങൾ. മുഖ്യമന്ത്രിയുടെ ഓഫീസുമായോ മുഖ്യമന്ത്രിയുമായോ യാതൊരു തരത്തിലുള്ള അന്വേഷണവും നടത്താതെയാണ് ഇത്തരം വ്യാജവാർത്തകൾ പ്രചരിപ്പിക്കുന്നതെന്നും ഓഫീസ് അറിയിച്ചു.

വ്യാജവാർത്തകൾ തിരിച്ചറിയാനും സത്യം മനസ്സിലാക്കാനും പൊതുജനങ്ങൾ ജാഗ്രത പാലിക്കണം. ഔദ്യോഗിക വിവരങ്ങൾക്കായി വിശ്വസനീയമായ സ്രോതസ്സുകളെ മാത്രം ആശ്രയിക്കുക.